In certain bondes, that they may not flee:
That same prince and mover eke, quod he,
Hath stablisht, in this wretched world adoun,
Certain of dayes and duration,
To all that are engendred in this place,
Over the which day they ne mow not pace,
Al mow they yet the dayes well abrege.
Ther nedeth non autoritee allege,
For it is preved by experience,
But that me lust declaren my sentence.
Than may men by this ordre well discerne,
That thilke Mover stable is and eterne;
Wel may men knowen, but it be a fool,
That every part deriveth from his hool;
For Nature hath not taken his beginning
Of no partie ne cantel of a thing,
But of a thing that parfit is and stable,
Descending so til it be corrumpable;
And therefore of his wise purveyance
He hath so wel beset his ordinance,
That speces of thinges and progressions
Shullen enduren by successions,
And not eterne, withouten any lie;
This maist thou understand, and seen at eye.
Lo the oke, that hath so long a norishing
Fro the time that it ginneth first to spring,
And hath so long a lif, as ye may see,
Yet at the laste wasted is the tre.
Considereth eke how that the harde stone
Under our feet, on which we trede and gone,
It wasteth, as it lieth by the wey;
The brode river sometime wexeth drey;
The grete tounes see we wane and wende;
Than may ye see that all thing hathe an ende.
Of man and woman see we wel also,
That nedes in on of the termes two,
That is to sayn, in youthe, or elles age,
He mote be ded, the king as shall a page;
Som in his bed, som in the depe see,
Som in the large feld, as ye may see:
Ther helpeth nought, all goth that ilke wey;
Than may I sayn, that alle thing mote dey.
What maketh this but Jupiter the King,
The which is prince and cause of alle thing,
Converting alle unto his propre wille,
From which it is derived, soth to telle?
And here-againes no creature on live
Of no degree availleth for to strive.
Than is it wisdom, as it thinketh me,
To maken vertue of necessite,
And take it wel that we may not eschewe,
And namely that to us all is dewe;
And whoso grutcheth ought, he doth folie,
And rebel is to him that all may gie.
And certainly a man hath most honour
To dien in his excellence and flour,
Whan he is siker of his goode name;
Than hath he don his frend ne him no shame;
And glader ought his frend ben of his deth,
Whan with honour is yolden up his breth,
Than whan his name appalled is for age,
For all foryetten is his vassalage:
Than is it best as for a worthy fame,
To dien whan a man is best of name.
The contrary of all this is wilfulnesse.
Why grutchen we? why have we hevinesse,
That good Arcite, of chivalry the flour,
Departed is, with dutee and honour,
Out of this foule prison of this lif?
Why grutchen here his cosin and his wif
Of his welfare, that loven him so wel?
Can he hem thank? nay, God wot, never a del,
That both his soule and eke himself offend,
And yet they mow her lustres not amend.
What may I conclude of this longe serie,
But after sorwe I rede us to be merie,
And thanken Jupiter of all his grace;
And er that we departen from this place,
I rede that we make of sorwes two
O parfit joye lasting evermo:
And loketh now wher most sorwe is herein,
Ther wol I firste amenden and begin.
Sister, (quod he) this is my full assent,
With all the avis here of my parlement,
That gentil Palamon, your owen knight,
That serveth you with will, and herte, and might,
And ever hath don sin you first him knew,
That ye shall of your grace upon him rew,
And taken him for husbond and for lord:
Lene me your hand, for this is oure accord.
Let see now of your womanly pitee:
He is a kinges brothers sone, pardee ;
And though we were a poure bachelere,
Sin he hath served you so many a yere,
And had for you so gret adversite,
It moste ben considered, leveth me,
For gentil mercy oweth to passen right.
Than sayed he thus to Palamon the knight;
I trow their nedeth litel sermoning
To maken you assenten to this thing.
Cometh ner, and take your lady by the hond.
Betwixen hem was maked anon the bond
That highte matrimoine or mariage,
By all the conseil of the baronage;
And thus with alle blisse and melodie
Hath Palamon ywedded Emelie ;
And God, that all this wide world hath wrought,
Send him his love that hath it dere ybought.
For now is Palamon in alle wele,
Living in blisse, in richesse, and in hele,
And Emilie him loveth so tendrely,
And he hire serveth all so gentilly,
That never was ther no word hem betwene
Of jalousie, ne of non other tene.
Thus endeth Palamon and Emelie ;
And God save all this fayre compagnie.
A POURE widewe, somdel stoupen in age,
Was whilom dwelling in a narwe cotage
Beside a grove stonding in a dale.
This widewe, which I tell you of my tale,
Sin thilke day that she was last a wif
In patience led a ful simple lif,
For litel was hire catel and hire rente;
By husbondry of swiche as God hire sente
She found hireself and eke hire doughtren two.
Three large sowes had she, and no mo,
Three kine, and eke a sheep that highte Malle ;
Ful sooty was hire boure and eke hire halle,
In which she ete many a slender mele ;
Of poinant sauce ne knew she never a dele:
No deintee morsel passed thurgh hire throte;
Hire diete was accordant to hire cote;
Repletion ne made hire never sike;
Attempre diete was all hire physike,
And exercise, and hertes suffisance;
The goute let hire nothing for to dance,
Ne apoplexie shente not hire hed:
No win ne dranke she nyther white ne red:
Hire bord was served most with white and black,
Milk and broun bred, in which she fond no lack,
Seinde bacon, and somtime an eye or twey,
For she was as it were a manner dey.
A yerd she had enclosed all about
With stickes, and a drie diche without,
In which she had a cok highte Chaunteclere,
In all the land of crowing n'as his pere:
His vois was merier than the mery orgon
On masse daies that in the chirches gon:
Wel sikerer was his crowing in his loge
Than is a clok or any abbey orloge:
By nature he knewe eche ascentioun
Of the equinoctial in thilke toun,
For whan degrees fiftene were ascended,
Than crew he that it might not ben amended.
His combe was redder than the fin corall,
Enbattelled as it were a castel wall;
His bill was black, and as the jet it shone,
Like asure were his legges and his tone,
His nailes whiter than the lily flour,
And like the burned gold was his colour.
This gentil cok had in his governance
Seven hennes for to don all his plesance,
Which were his susters and his paramoures,
And wonder like to him as of coloures,
Of which the fairest, hewed in the throte,
Was cleped faire Damoselle Pertelote.
Curteis she was, descrete and debonaire,
And compenable, and bare hireself so faire,
Sithen the day that she was sevennight old,
That trewelich she hath the herte in hold
Of Chaunteclere, loken in every lith;
He loved hire so, that wel was him therwith:
But swiche a joye it was to here hem sing,
Whan that the brighte sonne gan to spring,
In swete accord: my lefe is fare in lond.
For thilke time, as I have understond,
Bestes and briddes couden speke and sing.
And so befell that in a dawening
As Chaunteclere among his wives alle
Sate on his perche that was in the halle.
And next him sate his faire Pertelote,
This Chaunteclere gan gronnen in his throte
As man that in his dreme is dretched sore;
And whan that Pertelote thus herd him rore
She was agast, and saide, herte dere,
What aileth you to grone in this manner?
|